Buxoroda Saudiya Arabistoni bilan hamkorlikda trigeneratsiya texnologiyasi asosida yangi loyiha amalga oshirilmoqda

“Issiqlikta’minoti” AJ boshqaruvi raisi Ilhom To‘rayev Buxoro shahrida Saudiya Arabistoni Qirolligining nufuzli “Saudi Tabreed” kompaniyasi bilan hamkorlikda amalga oshirilayotgan yangi loyiha jarayonlarini joyida o‘rgandi.
ㅤ
Mazkur loyiha Buxoro turistik markazi binolarini zamonaviy issiqlik va sovitish tizimi bilan uzluksiz ta’minlovchi trigeneratsiya qozonxonasi (bir vaqtning o‘zida elektr, issiqlik va sovuqlik energiyasi ishlab chiqaruvchi tizim) qurilishini ko‘zda tutadi.
ㅤ
Hozirda “Saudi Tabreed” vakillari ob’yektlarni barpo etishga jalb qilingan Turkiyaning “Koç” qurilish kompaniyasi mutaxassislari bilan o‘zaro ma’lumot va tajriba almashmoqda.
ㅤ
Loyihaning umumiy qiymati 9,04 mln AQSH dollarini tashkil qiladi.  Natijada, 20,4 Gkal issiqlik energiyasi, 8,6 MVt elektr energiyasi, 5,2 MVt sovitish tizimi ishlab chiqarish quvvatiga ega kombinatsiyalashgan issiqlik-elektr stansiyasi barpo etiladi.