“Issiqlikta’minoti” AJ va tizim korxonalarida korrupsiyaning oldini olish, manfaatlar to‘qnashuviga yo‘l qo‘ymaslik bo‘yicha tizimli targ‘ibot-tushuntirish ishlari olib borilmoqda. Mana shunday uchrashuvlar “Issiqlikta’minoti” AJ boshqaruvi raisining Rejim va maxsus ishlar bo‘yicha maslahatchisi Gʻ.Nazarov tomonidan Farg‘ona viloyati "Issiqlik ta’minoti" MCHJ hamda “Qirguli issiqlik ta’minoti” MCHJda o‘tkazildi.

Unda korrupsiyaga yetaklovchi omil va shart-sharoitlarga alohida to‘xtalindi. Xususan, issiq suv hisoblagichlarni almashtirish, issiq suv va issiqlik energiyasidan yuzaga kelgan qarzdorlikni undirish bilan bog‘liq holatlarda ayrim xodimlar tomonidan tamagirlik va firibgarlik yo‘li bilan shaxsiy manfaatlarni ko‘zlagan holda pul mablag‘larini olish yoki hisoblagich ko‘rsatkichlariga fuqaro bilan til biriktirgan holda o‘zgartirish kiritish holatlari uchrayotgani qayd etildi.

Shuningdek, o‘z xizmat vazifalarini bajarishda manfaatlar to‘qnashuviga yo‘l qo‘ymaslik bo‘yicha ham tushuntirishlar berildi.

Gʻ.Nazarov 2025 yil davomida “Issiqlikta’minoti” AJning hududiy korxonalarida sodir bo‘lgan ayrim qonunbuzilish holatlarini misollar orqali keltirib o‘tdi. Har qanday qonunbuzarlik, mansab vakolatlarini suiiste’mol qilish, tamagirlik va til biriktirish holatlariga nisbatan keskin choralar ko‘rilishi, aybdor shaxslar muqarrar ravishda javobgarlikka tortilishi ta’kidlandi.